نَكبة فَلَسطين – ياسين مصطفى بكري….

فلسطين نور الشَمس والاقمار

إنتِ الكَرَم يا أحلى غِنية

 

النَكبة مُرة ودافَعوا الاحرار

والشَعب فيكي نَبِع حِنية

 

بقَرية شَعَب لو تعرفوا شو صار

دَخلَت عصابة بشَكل دَورية

 

دار القَتِل وسَكَروا الابار

عرفنا بإنها جيوش مَبنية

 

والبِروة فيها صار ضَرب النار

والحَرب صارَت حَرب شَعبية

 

عا دَرب عَكا تجَمعوا الثُوار

والمعرَكة صارت على اللَية

 

فيها أبي الثائر المِغوار

والروح صارت اجمل ضحية

 

وصار القَتِل في كل دار ودار

والقَصف من طيارة حَربية

 

تشَتَتوا الاخوة وكانوا صغار

بليلة ما فيها نجوم مَضوية

 

مع أمي طِلعوا تخَبوا بالاشجار

وكانَت وحوش كثير بَرية

 

إستَشهدوا أربع شباب كبار

عَم بِشرَبوا عا نَبعة المَية

 

تخَردقوا بِرصاص من غَدار

ما بعرف الرحمه السَماوية

 

غابَت شَمِسنا والشَعب جَبار

رَح تِشرِقي والنور حُرية

 

لَن نَنحَني إلا الى الغَفار

بنَسمة مَحَبة الام شَرقية

 

ملوك العَرَب ما بِسمَعوا الاخبار

ولا سِمعوا بالنكبة المَصيرية

 

للغَرب دَيما بِقطَعوا لِبحار

تا يِسهَروا مع بنت غَربية

 

باقي شَعِبنا للابد هَدار

والبعنة حَمرا يا جَليلية

 

بكُل الشاغور نكَسِر الاحجار

نحِب الوَطَن والحُب أمنية

 

شوفوا القِيامة الليل فيها نهار

شموع من قِديس مَضوية

 

والاقصى فيه للكرامة دار

والصَخرة احمي بنور عينية

 

هذا أمير وللغَرب مُختار

وهذا مَلك مع لِحية بُنية

 

وهذا رئيس بيِعشَق الدولار

فلسطين من الله مَحمية

 

فلسطين حُب الشاب والختيار

وحبي الشَهيد بروح ثَورية

 

مَهما كَتَبنا حروف او أشعار

بتظَلي يا فلسطين عَربية

 

وبتظَلي دَوما حاملة الاسرار

وشَعبِك بِحِك مية بالمية